1 Corinthians 1

Parosifa kuisow fain Pol-ke wi Korin wia siisimomak

1Aria yo Pol-ke Sostenes ikos ni Mua Maneka teeria Korin-pa ikeman nain parosifa fain nia siisimomimik. Mua Maneka ona efa pepekimeya aposel uuwowa-pa efa wuak. Ni Mua Maneka-ke ona nia nanikap Yeesus Krais wameiya nia wueya ona teeria kakeniw ikeman. Me ni niisow, wi owow-owowa mua eena anane Yeesus Krais farimik, wi nain pun. O eena i unowiya yiena Saria Maneka nain. I yiam erup feenap nia naimik, yiena Auwa Mua Maneka ne yiena Maneka Yeesus Krais nia kemalowa ne kema eliwa niar ikainok.

Pol Mua Maneka sira eliwa naakek

4Yo anane Mua Maneka faremi sira eliwa naakiyem, moram o Yeesus Krais muuta nain nia kookalep nia asipami maa unowa wenup nia onomiya. 5Neemi maa ele-eliwa iiwawun unowa nia pepek aroweya amis sira-sira eliwa aaweman. Naeya opora sira ele-eliwa unowa aakuniman. 6Sira naapiw, i Krais opora nia maakemkun ni kekanep opap kakeniw ikeman. 7Naapeya neeke Ewar Eliwa-ke kema eliwa niemi amisa ne uuwowa ononer pun pepek nieya naap oniman, yiena Maneka Yeesus Krais nainiw ekapowa nain arewami. 8Os-ke nia kekanowam-ikainon. Naap ikip ikip o nainiw ekapiya fofa neeke ni pina marew, eliwa ikowen. 9Mua Maneka eena nia fareya Yeesus Krais wameiya epaskun akena ikeman nain makena-ke. Maa maek nain naap oninon.

Wi Yeesus Krais teeria wiam fo-fookamik

10Aria emar unowik, yiena Maneka Yeesus Krais unuma-pa feenap nia maakiyem, opora niam fi-fienami me niam fo-fookeka nia naakiyem. Ni feenap oneka, kema kuisow wuami epaskun ikok Krais sira wiar ookam-ikeka. 11Moram Klo teeria mua papako-ke nia maiwkin miimam, ni niam irewap niam fo-fookaman naemik. 12Feenap, mua oko-ke maiya, yo Pol opora wiar ookiyem, oko-ke yo Apolos ookiyem, oko-ke yo Pita ookiyem ne oko-ke yo Krais ookiyem, naap niam fo-fookaman. 13Krais mia ara naap wame fo-fookak-i? Weetak. Yo Pol-ke ni muuta nain nomokow moke-pa umem-i? Ne yo Pol unuma efa unufami eka-pa nia yasuwamik-i? Naap maiman-i? 14Naapeya maiyem, eliw akena yo Krispus Gaius ikos muutiw wia yasuwam, ni mua oko oko-ko me nia yasuwam. 15Naeya ni feenap me maowen, “Yo nos-ke efa yasuwan, naeya no teeria-pa ikainen,” naap me maowen. 16E wia, Stefanas teeria pun yos-ke wia yasuwam. Ne wi mua oko-ko me wia yasuwam, yo kema suuwiyem-na wia. 17Moram, yo Krais uuwowa yiek nain uuwowa oko yiek, nain-ko me yiek. Ona opor eliwa wia maakowa uuwowa nain-ke makena, yo yiek. Naeya yo Krais opor eliwa maemi wi mua amis maneka opora nain onaiya kunefap me wia maakinen, oko Krais umok opora nain nanar oram-ke naikuan, kekanowa me urufikuan.

Mua Maneka Krais sesekami ona amis maneka yia ofakowak

18Wi mua Mua Maneka teeria-pa me wiar ikemik nain, ikoka iiwawun mesenalikuan. Wi nain-ke Krais nomokow moke-pa umok opora nain makena-ke me naimik, momor opora-ke naimik. Ne i mua, opora wiar ookamkun Mua Maneka yia aawok nain-ke maimik, opora nain makena ne kekanowa onaiya ikua. 19Iiriw opora Mua Maneka-ke feenap maeya siisimep-puamik,

“Wi amis mua woos eliwa ikoka wiar weeser-wuinen. Ne amis maneka aawem-ikaimik nain pun wiar puukinen.”
(Aisaiya 29.14)

20Wi amis mua-ke eliw wia asipikuan-i? Wi sira amis mua-ke eliw wia asipikuan-i? E, wi mua aakunowa eliwa nain-ke eliw wia asipikuan-i? Neemi Mua Maneka-ke i miiw mua yiena amis maneka nain makena-ke yiar naiya-i? Aa, weetak, maa nain oram-ke ne momor opora-ke yiar naiya. 21Ne Mua Maneka ona amis eliwa-pa sira naap wuak, wi mua wiena kema-pa era imenap yo efar ekapowa me pepek. Naapeya wia naapami Yeesus sesekamkun nomokow moke-pa umemi era wia eepomaya eliw yo efar ekapuk, naap maek. Wi yo opora makena-ke efar naimik, wi nain. Aria wi papako-ke opora nain makena-ke me naimik, momor opora-ke maimik. 22Ne wi Yuuda-ke anane maimik, “Maa miililina-ko imenareya i urufap makena-ke naiyen.” Ne wi Grik-ke feenap maimik, “I amis maneka aawiyen-na eliw ikaiyen,” naap maimik. 23Nain i opora fain muutiw wia maakimik, Krais nomokow moke-pa umok, opora nain. Ne weetak, wi Yuuda-ke miimap maimik, “Opora naap-ko me maimik,” ne wi Grik-ke maimik, “Opora nain momor opora-ke.”

24Ne aria wi Yuuda ne wi Grik teeria mua papako iiriw Mua Maneka-ke wia fareya o teeria-pa wiar ikemik. Wi nain-ke maimik, Krais-ke umemi Mua Maneka kekanowa ne amis eliwa wiar ikua nain yia ofakowak, naap maimik. 25Moram, Mua Maneka amisa eena eliw marew naimik nain eliw akena-ke, wi mua amisa wiar nomakep ikua. Ne Mua Maneka sira naap oneya kekanowa marew naimik, nain kekanowa akena-ke, wi mua kekanowa wiar nomakep ikua.

26Aria emar unowik, ni kema suuweka, ni iiriw mua kamenap ikaiwkin Mua Maneka-ke nia farep nia aawok. Wi miiw mua mokoka-pa ni me mua unowiya amis onaiya ikeman. Ni me mua unowiya mua unumiya ne mua meta maneka areman. Ne ni me mua unowiya owow saria teeria-ke, weetak. 27Ne Mua Maneka-ke wi mua amisa nain wia porekam naep ni amis marewa nain nia aawok. Ne wi mua kekanow onaiya ikemik nain wia porekam naep ni mua kekanow marewa nain nia aawok. 28Ne wi unum marewa, wi mua oorpowa, ne wi mua kua-pa ikemik nain, wi mua sira naap nain wia aawok. Naeya wi miiw mua i eliwa-ke naemi wiam piram-ikemik nain iiwawun kua-pa wia wuak. 29Naeya mua kuisow-ko feenap maemi me wame pirinok, “Yo yena kekanowa e amis maneka-pa Mua Maneka teeria wiar ekam.” Weetak. 30Moram os-ke ni Krais wameiya-pa nia wuami ona amis eliwa niek, nain feenap, Krais-ke umep yia aaweya pina marew ikemik, ne anane naap yia kakenam-ikaiya. Ne ikoka pina iiwawun yiar iirarep yia aaweya anane eliw manekiw ikaiyen. 31Naapeya Mua Maneka opor ara oko feenap siisimep-puamik, “O mua onom marew momor me wame pirinok. Mua Maneka kema suuwap kemelami o unuma pirinok.”